Italia do të përdorë një aplikacion tashmë që do të bëjë të mundur gjurmimin e kontaktit të personave të prekur me koronavirus.
Aplikacioni, i quajtur ‘Immuni’ është aprovuar nga organi kombëtar dhe sipas Ministrisë së Shëndetësisë respekton normat italiane dhe evropiane të privatësisë.
“Aplikacioni është në gjendje të përcaktojë se kontakti ka ndodhur midis dy përdoruesve, pa e ditur se kush janë ata përdorues dhe ku ka ndodhur kontakti,” tha kompania me qendër në Milano, Bending Spoons, e cila zhvilloi aplikacionin.
Ministrja e Inovacionit, Paola Pisano tha se aplikacioni për gjurmimin e kontaktit nuk ka për qëllim gjeolokimin, por rindërtimin e çdo kontakti mes njerëzve.
Aplikacioni regjistron sinjalet e afërsisë falë Bluetooth dhe wi-fi, si dhe paralajmëron ata që kanë rënë në kontakt me një person që është pozitiv nga Covid-19.
Në rast se dikush dëshmohet pozitiv, operatori mjekësor përmes një kodi identifikimi anonim do të dërgojë një mesazh alarmi për të informuar të gjithë ata përdorues, të identifikuar gjithmonë në mënyrë anonime, të cilët kanë rënë në kontakt me atë që ka kontaktuar më parë virusin.
Sipas mediave italiane, përdoruesit duhet të jenë të paktën 14 vjeç. Ndërsa ata midis moshës 14 dhe 18 duhet të kenë autorizimin e të paktën të një prindi ose kujdestari ligjor, për ta shkarkuar atë.
Fillimisht ky aplikacion do të lançohet në rajonet e Abruzzo, Liguria, Marche dhe Puglia-s. Aplikacioni do të fillojë përdorimin që nga 8 qershori, ndërsa ai mund të shkarkohet shumë lehtë nga Apple dhe Google.
