Spanja ka zgjatur për herë të pestë gjendjen e jashtëzakonshme, për shkak të situatës së krijuar nga koronavirusi.
Kryeministri i Spanjës, Pedro Sánchez mori mbështetjen parlamentare nga një shumicë e ngushtë, teksa nuk munguan edhe debatet në Kuvend.
Sipas mediave vendase, 177 deputetë të parlamentit me 350 vende votuan në favor të zgjatjes. Gjendja e jashtëzakonshme e cila është vendosur që nga 14 marsi, tashmë do të zgjasë deri më 7 qershor.
Hapja e ngadaltë e vendit dhe pasiguria ekonomike po rrisin zhgënjimin midis qytetarëve. Çdo natë në Madrid dhe qytete të tjera, protestuesit dalin në ballkone dhe rrugë, duke goditur enë me lugë metalike në formë proteste dhe duke kërkuar dorëheqjen e qeverisë.
Banka Qendrore e Spanjës pret një rënie ekonomike 12.4 për qind këtë vit, pasi vendi varet nga turizmi dhe shërbimet që janë paralizuar për dy muaj.
Spanja është një nga vendet më të prekura nga COVID-19 në botë. Me rreth 280 mijë raste të konfirmuara, ajo renditet e treta në botë për numrin më të lartë të rasteve, pas SHBA-ve dhe Rusisë.
Sa i përket numrit të viktimave, Spanja renditet e pesta në botë me numrin më të lartë (27.888), pas SHBA-ve (94.160), Mbretërisë së Bashkuar (35,704), Italisë (32,330) dhe Francës (28,132).
