Pas mbledhjes me aletatët në selinë blu, kryedemokrati Basha lëshoi një lum akuzash ndaj kryeministrit Rama.
Ai shigjetoi kreun e qeverisë se ka marrë peng shtetin dhe kulturën. Kreu i PD-së tha se vendi drejtohet nga një kriminel, dhe se opozita është e vendosur për të marrë të gjitha hapat për largimin një orë e më parë, të Edi Ramës. Po kështu konfirmoi për vijimin e protestave mbarëkombëtare.
“Dita e sotme është një tjetër shembull i keq, kur vendi drejtohet nga një kriminel e hajdut ordiner, i cili ka marrë peng shtetin dhe institucionet e bukën e shqiptarëve.
Kemi denoncuar korrupsionin, lidhjet me krimin dhe zgjedhjet e vjedhura e manipuluara në Shqipëri.
E sotmja është një tjetër aferë e radhës, por jo vetëm kaq. Është guri i rëndesës në shpirtin e çdo shqiptari që merakoset për të ardhmen e fëmijës së tij.
Sot para 3 vitesh u ula me këtë njeri, me shpresë për të bërë një marrëveshje për shqiptarët.
Por koha tregoi se unë gabova. Por ky gabim nuk do të ndodhë më. Opozita do të bëjë çdo veprim demokratik.
Vendimi ynë i parë është mbështetja e protestave të Aleancës për Teatrin dhe shoqërisë civile dhe nisja e përgatitjes së protestave nga opozita”.
