Rrjeti i njohur social, Twitter, ka vendosur që të lejojë stafin që të punojë gjithmonë nga shtëpia.
5,000 punonjësit e kompanisë Twitter tashmë mund të punojnë nga shtëpia përgjithmonë, mjafton që të kenë kushtet bazike.
Kujtojmë se ata kanë punuar në distancë që prej fillimit të marsit, për shkak të koronavirusit.
Mirëpo, me kalimin e ditëve, puna ka vijuar me ritme aq pozitive saqë Twitter mori vendimin që t’i lejojë ata të vazhdojnë të punojnë nga shtëpitë e tyre.
“Muajt e fundit kanë dëshmuar se mund ta bëjmë këtë”, tha shefi ekzekutiv Jack Dorsey.
“Nëse punonjësit tanë janë në një rol dhe situatë që ua lejon atyre të punojnë nga shtëpia dhe ata duan të vazhdojnë ta bëjnë këtë përgjithmonë, ne do t’ua mundësojmë”, vijoi ai.
Për pjesën tjetër të stafit që e kanë të pamundur ta bëjnë diçka të tillë, Twitter pohoi se ka gjasa që t’i hapë zyrat nga fundi i vitit, “por jo përpara shtatorit”.
