Shtetet e Bashkuara të Amerikës kanë regjistruar bilancin më të ulët nga koronavirusi, që nga fundi i muajit mars.
Sipas Worldometer, ditën e djeshme në SHBA janë shënuar 750 viktima, pothuajse gjysma e shifrës që u regjistrua një ditë më parë (1,422).
Një ulje e ndjeshme është regjistruar edhe në evidentimin e rasteve të reja. Ditën e djeshme u regjistruan 20,329 raste të reja infektimi, shifra më e ulët kjo që nga fundi i muajit mars.
Deri më tani SHBA numëron 1,367,638 raste infektimi dhe 80,787 viktima. Më shumë se 256 mijë persona janë shëruar nga COVID-19 në SHBA, ndërsa mbi 1 milionë raste janë ende aktive. New York është vendi më i prekur, me 26,812 persona të vdekur.
Tre pjesëtarë të Task Forcës së Shtëpisë së Bardhë për koronavirusin janë në vetëkarantinim për dy javë, pasi dyshohen të jenë ekspozuar ndaj sëmundjes.
Drejtori i Institutit Kombëtar për Alergji dhe Sëmundje Infektive të SHBA-së, Anthony Fauci është vetëizoluar, së bashku edhe me dy anëtarë të tjerë të Task Forcës së SHBA-së për koronavirus, pasi kanë pasur kontakt me një person të infektuar.
Fauci, 79 vjeç, ka dalë negativ në testin për sëmundjen COVID-19, por do të testohet sërish në ditët në vijim.
Koronavirusi ka prekur më shumë se 4,1 milionë njerëz nga e gjithë botë, ndërsa i ka marrë jetën mbi 283 mijë personave.
