5 Maji, Dita e Dëshmorëve, do të bashkojë edhe njëherë presidentin Meta dhe kryeministrin Rama, për të kryer homazhe për ata që dhanë jetën për lirinë e Shqipërisë. Ndryshe nga vitet e tjera, ky 5 maj vjen në një moment shumë të vështirë për vendin tonë, pasi jemi në një periudhë pandemie.
Në orën 10:00, presidenti Ilir Meta, kryeministri Edi Rama dhe kreu i Kuvendit, Gramoz Ruçi, do të jenë në varrezat e dëshmorëve, për të kujtuar të rënët e për të vendosur kurora me lule pranë Monumentit “Nënë Shqipëri”.
Ceremonia pritet të jetë nën masa të rrepta sigurie, për shkak të situatës së krijuar nga pandemia COVID-19, ku nuk do të ketë shtrëngime duarsh mes të pranishmëve.
Kryetari i Partisë Demokratike, Lulzim Basha, pritet që të jetë i veçuar nga pjesa tjetër e politikës, duke kryer homazhet pa praninë e Ramës dhe Metës.
Vlen të theksohet fakti se marrëdhëniet mes Kreut të Shtetit, Ilir Meta dhe kryeministrit Rama kanë qenë të tensionuara deri para pak ditësh, ku të dy ranë dakord për ndryshimet në Kodin Penal dhe për masat e marra ndaj koronavirusit.
