Qeveria e Futbollit Evropian (UEFA) do të shpërndajë një fond prej 236.5 milionë eurosh ndihmë, për t’i ndihmuar federatat evropiane për të përballuar krizën e shkaktuar nga koronavirusi.
Secila prej 55 federatave, përfshirë këtu edhe Shqipërinë do të përfitojnë nga 4.3 milionë euro secila.
Ky fond është nga programi HatTrick që është krijuar në vitin 2004, për të mbështetur zhvillimin e disa zonave specifike të sektorit futbollistik, në secilin prej vendeve në Evropë.
Në një komunikatë për shtyp, UEFA tha se çdo federate i jepet e drejta për të përdorur kuotën e saj, në mënyrën që konsideron më oportune duke parë efektin negativ të pandemisë.
“Sporti ynë po përballet me një sfidë të paprecedentë të diktuar nga kriza e Covid-19. UEFA dëshiron të ndihmojë anëtarët e saj për t’iu përgjigjur në mënyrën më të përshtatshme rrethanave specifike. Kështu që akorduam këtë fond për secilën prej federatave për pjesën e mbetur të sezonit dhe atë pasardhës edhe si pjesë e fondit të investimeve. Mendoj se ky është një vendim i përgjegjshëm për të dhënë sa më shumë ndihmë që të mundemi”, tha presidenti i UEFA, Alexander Ceferin.
