Ministrat u paralajmëruan vitin e kaluar në një konferencë konfidenciale të Zyrës së Kabinetit, se Mbretëria e Bashkuar duhet të kishte një plan, që do të trajtonte situatën në rastin e një virusi pandemik dhe pasojave të tij sociale dhe ekonomike.
Dokumenti i detajuar paralajmëroi që edhe një pandemi e ‘butë’ mund të kushtojë dhjetëra mijëra jetë dhe të përcaktojë “aftësitë” e domosdoshme për të zbutur rreziqet për vendin, bën me dije një artikull i “The guardian”.
Një lajm i tillë vjen ndërsa numri i vdekjeve në spitalet e Mbretërisë së Bashkuar, e ka arritur shifrën 20,000.
Shënuar si dokument ‘zyrtar, i ndjeshëm’, Vlerësimi i Riskut të Sigurisë Kombëtare 2019 (NSRA) u nënshkrua nga z. Patrick Vallance, këshilltari kryesor shkencor i qeverisë, si dhe një këshilltar i lartë i sigurisë kombëtare kryeministrit.
Rekomandimet brenda tij përfshijnë nevojën për të grumbulluar PPE (pajisje personale mbrojtëse), organizimin e marrëveshjeve të avancuara të blerjes së pajisje të tjera thelbësore, krijimin e procedurave për mbikëqyrjen e sëmundjeve, gjurmimin e kontakteve dhe hartimin e planeve për të menaxhuar një rritje të numrit të vdekjeve.
Planet për të ndihmuar shtetasit britanikë jashtë vendit dhe riatdhesimin e tyre në Mbretërinë e Bashkuar, u shënuan në dokument, gjithashtu si përparësi.
Dokumenti i Zyrës së Kabinetit, i cili është më shumë se 600 faqe, jo vetëm që analizoi rrezikun e një pandemie virale, por gjithashtu adresonte në mënyrë specifike potencialin e vendit në rastin e një shpërthimi të koronavirusi (Sars dhe Mers më parë ishin të dy koronaviruse), megjithëse e konsideronte pandeminë si shumë më pak të dëmshme.
Por një burim që ka njohuri rreth dokumentit të Zyrës së Kabinetit, tha që Mbretëria e Bashkuar nuk ishte përqendruar siç duhet në kërcënimet e pandemisë dhe nuk kishte analizuar më kujdes çdo aspekt.
Dokumenti thoshte:
Një pandemi mund të ketë “tre valë”, me secilën valë që pritet të zgjasë 15 javë … “me javët e pikut që ndodhin në javën e 6 dhe të 7, në secilën valë”.
50% e popullsisë do të infektohej dhe do të pësonin simptoma të gripit pandemik, gjatë një ose më shumë valëve. Numri aktual i personave të infektuar do të ishte më i lartë se kjo, pasi do të kishte një numër rastesh asimptomatike.
Një pandemi me rrezik të lartë mund të çojë në 65.600 vdekje.
Kostoja për Mbretërinë e Bashkuar mund të jetë 2.35 trilion paund.
Edhe pas përfundimit të pandemisë, ka të ngjarë që do të duhen muaj apo edhe vite që shërbimet shëndetësore dhe të kujdesit shoqëror të shërohen plotësisht.
Do të ketë një zemërim të konsiderueshëm publik mbi një trajtim të dobët nga ana e qeverisë. /opinion
