Kryeministri Edi Rama ka folur në lidhje me numrin e testimeve për koronavirusin që janë kryer në Shqipëri.
Në një komunikim live në Facebook, Rama ritheksoi se strategjia e përdorur nga qeveria është e saktë. Kjo strategji sipas tij është diskutuar edhe me ekspertë nga Gjermania dhe vendet e tjera.
Sipas kreut të qeverisë, edhe Gjermania ndjek të njëjtin sistem si Shqipëria, duke mos testuar personat asimptomatikë por vetëm ata që shfaqin simptoma.
“Strategjia jonë e testeve është e saktë. Edhe dje në diskutimin me ekspertët gjermanë, por edhe me ekspertë të tjerë, kemi konfirmuar plotësisht nga biseda se ne kemi strategjinë e duhur. Gjermania nuk teston persona asimptomatikë, nuk nxjerrë tamponët rrugëve, por ka të njëjtin sistem dhe ndjek gjurmët, siç bëjmë edhe ne. I bie që populli të bëjë testin çdo ditë, por nuk funksionon kështu, është një idiotësi një interpretim i tillë. OBSH thotë testo, testo, testo, kontakte, jo bëjë tamponë në ajër”, tha ai.
Ndërkohë sa i përket pagës së luftës, Rama tha se ditën e sotme 49 122 persona i kanë paratë në bankë dhe do të shkojë kjo shifër në 176 mijë. Sipas tij, në total do të jenë 260 mijë persona që do të paguhen.
