Bashkimi Evropian e ka ndihmuar Kosovën me material shëndetësor i cili shërben për të nxjerrë rezultatin e testit ndaj koronavirusit.
Kjo është bërë e ditur në faqen në Facebook, të Zyrës së Bashkimit Evropian në Kosovë.
Sipas njoftimit, materiali i dorëzuar mund të shërbejë për të vërtetuar deri në 60 mijë teste të koronavirusit.
“Kosova sapo ka marrë materiale për kalibrimin e testit për Covid19. Materiali është i nevojshëm për të vërtetuar rezultatet e Covid19 dhe të sigurojë që personat e infektuar diagnostikohen siç duhet”, thuhet në njoftimin e Zyrës së Bashkimit Evropian.
Më 23 prill në Kosovë është konfirmuar vdekja e 19-të si pasojë e koronavirusit të ri.
Marrë parasysh të dhënat e fundit, deri më tani në Kosovë, 630 persona janë të infektuar më koronavirus.
Nga sëmundja Covid-19, që shkakton ky virus janë shëruar 138 persona.
Me qëllim të luftimit të kësaj sëmundjeje, autoritetet në Kosovë kanë shpallur gjendje emergjente për shëndetin publik. /Rel
