Gjermania ka regjistruar sot një ulje të ndjeshme të numrit të viktimave të shkaktuara nga koronavirusi, në krahasim me ditët e mëparshme.
Në 24 orët e fundit në Gjermani janë shënuar 72 viktima, 148 më pak se dje ku u regjistruan 220 persona të vdekur. Ky është bilanci më i ulët i Gjermanisë në 4 javët e fundit.
Një ulje të ndjeshme ka pasur edhe në shtimin e rasteve të reja. Në 24 orët e fundit janë regjistruar 893 raste të reja, rreth 500 më pak se dje.
Deri më tani, Gjermania numëron 4,934 viktima dhe mbi 147 mijë raste të personave të infektuar. Mbi 95 mijë persona janë shëruar në Gjermani, teksa vetëm 47,824 raste janë ende aktive.
Gjermania renditet e pesta në botë për numrin më të madh të personave të infektuar, pas SHBA-ve (802,590), Spanjës (204,178), Italisë (183,957) dhe Francës (155,383).
Pavarësisht se kanë një numër më të vogël të infektuarish, Mbretëria e Bashkuar, Irani dhe Belgjika shënojnë një numër më të madh viktimash se Gjermania.
Më shumë se 2,5 milionë njerëz nga e gjithë bota janë prekur nga koronavirusi, ndërsa mbi 174 mijë persona kanë humbur jetën.
