Komisioni i Ligjeve miratoi sot propozimin për zgjatjen e gjendjes së fatkeqësisë natyrore deri në 23 qershor 2020. Në mbledhjen e zhvilluar online, të drejtuar nga kryetari i këtij komisioni, Ulsi Manja, ishte i pranishëm edhe Ministri i Shtetit për Rindërtimin, Arben Ahmetaj.
Me shumicë votash, komisioni miratoi projektvendimin “Për propozimin Kuvendit të Republikës së Shqipërisë, për dhënien e pëlqimit për zgjatjen e gjendjes së fatkeqësisë natyrore, të shpallur me vendim nr. 243 datë 24.03.2020, të Këshillit të Ministrave”, deri në datën 23.6.2020.
Pro këtij projektligji votuan shumica e deputetëve në Komision, ndërsa deputetët Alban Zeneli dhe Andi Përmeti abstenuan.
Dje qeveria i kërkoi Kuvendit zgjatjen e gjendjes së fatkeqësisë natyrore. Gjatë 24 orëve të fundit kanë dalë 25 raste të reja me koronavirus, duke e çuar në 609 numrin e të infektuarve. Sot është dita e parë që nga fillimi i epidemisë, që Tirana nuk ka rast të ri. Deri më sot, 26 qytetarë e kanë humbur betejën me këtë sëmundje, megjithë përpjekjet e stafit mjekësor.
