Presidenti i Kosovës, Hashim Thaçi i ka dërguar një tjetër letër kryeministrit ende në detyrë, Albin Kurtit.
Përmes kësaj letre, mësohet se Thaçi i ka kërkuar Kurtit që të dërgojë emrin e kandidatit/es për kryeministër.
Kjo është letra e tretë që kreu i shtetit të Kosovës i ka dërguar kreut të Vetëvendosjes. Qeveria e Kurtit u rrëzua muajin e kaluar, kur në Kuvend u votua mocioni i mosbesimit ndaj tij.
“Përkundër kërkesave të dërguara më 2 prill 2020 (Ref. 354), më 10 prill 2020 (Ref. 354/1) dhe më 15 prill 2020 (Ref. 370/1), edhe në shkresën tuaj të dërguar më 17 prill 2020 (Ref. 122/2020), ju nuk keni propozuar kandidatin/en për Kryeministër, por keni theksuar se nuk jeni duke refuzuar për të propozuar kandidatin për kryeministër.
Më lejoni t’ua theksoj se mosrefuzimi nga ana juaj nënkupton që ta dërgoni emrin e kandidatit/es për Kryeministër. Por, ju nuk e keni bërë ende këtë, përkundër faktit që ua kam dërguar tri kërkesa për këtë qëllim”, shkruhet në letrën e presidentit të Kosovës.
