Shtetet e Bashkuara të Amerikës regjistrojnë 20,064 viktima nga koronavirusi, duke ia kaluar kështu edhe Italisë e cila mbante kryesimin prej më shumë se 1 muaji.
Deri më tani në shtetin fqinj janë regjistruar 19,468 viktima, ndërsa kurba duket të jetë në ulje. Ndryshe nga SHBA e cila shënon rritje të kurbës nga dita në ditë.
SHBA mban rekordin edhe për numrin më të madh të viktimave të shënuara brenda një dite, teksa në bilancin e fundit ditor ka regjistruar më shumë se 2,100 viktima.
Më shumë se 521 mijë raste infektimi numërohen deri më tani në SHBA. New York është vendi më i prekur, duke shënuar një numër më të madh rastesh se çdo shtet tjetër në Evropë (180,458).
Në Evropë kurba po sheh një ulje në Spanjë dhe Itali, ndërsa në Mbretërinë e Bashkuar, Francë dhe Zvicër, numri i viktimave vijon të jetë i lartë.
10 vendet më të prekura nga koronavirusi në botë (sipas numrit më të madh të të infektuarve):
- SHBA – 522,320 raste të konfirmuara
- Spanjë – 161,852 raste
- Itali – 152,271 raste
- Francë – 129,654 raste
- Gjermani – 123,878 raste
- Kinë – 81,953 raste
- Mbretëri e Bashkuar – 78,991 raste
- Iran – 70,029 raste
- Turqi – 52,167 raste
- Belgjikë – 28,018 raste
Më shumë se 1,7 milionë raste janë regjistruar nga koronavirusi në të gjithë botën, ndërsa 107,724 persona kanë humbur jetën.
