Në një video-mesazh të bërë publik, kryeministri ende në detyrë i Kosovës Albin Kurti ka pohuar se ka politikanë e zyrtarë në Prishtinë dhe Beograd që duan konflikt në Kosovë, sidomos në veri të Ibrit.
“Tash duan konflikte e gjakderdhje në terren për t’u rikthyer te shkëmbimi territorial përkatësisht te ndarja e Kosovës. Krejt njëjtë është edhe ajo intenca për të shpallur Gjendje të Jashtëzakonshme me çdo kusht e çmim. Pasi që nuk arritën ta shpallin për ta bërë, duan ta bëjnë për ta shpallur”, u shpreh Kurti.
Kujtojmë se ditën e djeshme Presidenti i Kosovës, Hashim Thaçi, kritikoi qeverinë në detyrë duke thënë se ajo është e papërgjegjshme ndaj situatës së krijuar me pandeminë në veri të Kosovës.
Dy komuna të veriut, Mitrovica e Veriut dhe Zveçani, janë vendosur në karantinë dhe kjo, sipas Thaçit është bërë jashtë kontrollit të institucioneve të Kosovës: “Qeveria e Republikës së Kosovës nuk guxon të lejojë që komunat në pjesën veriore të Kosovës të funksionojnë jashtë kontrollit menaxhues të institucioneve dhe organeve kompetente për parandalimin e pandemisë COVID-19, duke iu krijuar kështu hapësirë ilegale vepruese autoriteteve të Serbisë brenda territorit të shtetit tonë”.
