Sikundër fundjava e shkuar, edhe këtë javë të gjithë banorët në vend do të izolohen në shtëpi nga e shtuna në mesditë e deri në orën 5 të mëngjesit të së hënës. Njoftimi është përcjellë nga ana e kryeministrit Rama, në vazhdën e masave të ndërmarra për mos përhapjen e koronavirusit.
“NGA NESËR, E SHTUNË 13.00, DERI TË HËNËN 05.00, NJËSOJ SI FUNDJAVËN E SHKUAR, TË GJITHË NË SHTËPI”, shkruan Rama në Facebook.
Pra nga nesër, do të ndryshojë sërish skema e lëvizjes së qytetarëve. Në urdhrin që tashmë po aplikohet çdo fundjavë, përcaktohet dhe fasha e re e orareve, ku në mesditë do të ndalohet lëvizja e këmbësorëve, por dhe automjeteve, deri në orën 05:00 të mëngjesit të së hënës. Të vetmit që do të jenë në rrugë jashtë këtyre fashave të orarit janë ushtria, policia si dhe media.
Sakaq, gjatë javës, çdo qytetarët që do të bëjë pazar duhet të njoftojë autoritetet një ditë para dhe pas marrjes së autorizimit mund të dalë nga banesa. Lejohet vetëm një person në familje të bëjë pazar, dhe orari i lejuar është vetëm 1 orë në ditë.
