Kryeministri i Izraelit, Benjamin Netanyahu është rikthyer në izolim, vetëm pak orë pas përfundimit të karantinimit të tij.
Arsye për këtë u bë kontakti fizik që ai kishte pasur me ministrin e Shëndetësisë, Yaakov Litzman, i cili rezultoi pozitiv me koronavirus.
Sipas mediave të huaja, Netanyahu do të qëndrojë sërish në karantinë deri ditën e mërkurë. Gjatë kësaj kohe ai do të testohet sërish.
Kryeministri i Izraelit kishte lënë izolimin dje, pasi një nga bashkëpunëtorët e tij ishte shpallur pozitiv me Covid-19 ditët e fundit.
Deri më tani në Izrael janë shënuar 6,211 raste me koronavirus, 107 prej të cilëve ndodhen në gjendje kritike për jetën. Sipas ministrisë izraelite të Shëndetësisë, 30 persona kanë humbur jetën që nga shpërthimi i koronavirusit.
