Banka e Shqipërisë ka marrë masat për të luftuar efektet e përhapjes së koronavirusit. Në një dalje për mediat, guvernatori i Bankës së Shqipërisë, Gent Sejko, njoftoi uljen e normës bazë të interesit nga 1% në 0.5%, niveli më i ulët ky në histori.
“Këshilli Mbikqyrës i BSH vendosi sot të ulë normën bazë të interesit nga 1 % në 0.5%, të ulë normën e kredisë nga 1.9 në 0.9%, dhe të mbajë të pandryshuar normën e interesit të depozitave një ditore në nivelin e 0.1 %”.
Sipas Sejkos, pandemia e koronavirusit është sfidë për ekonominë dhe sektorin tonë financiar, dhe do ketë ndikim të dyfishtë.
Sejko nënvizoi se ulja e normës së interesit lehtëson presionin mbi bilancet financiare të operatorëve ekonomikë, duke u dhënë kohë e frymëmarrje për përballimin e goditjes nga pandemia.
