Ditën e djeshme jehoi në të gjitha mediat e huaja lajmi se kancelarja gjermane, Angela Merkel ishte vënë në karantinë. Ajo u vetëizolua në shtëpinë e saj, pasi një mjek me të cilin ajo kishte pasur kontakt rezultoi pozitiv me koronavirus.
Ndërkohë në lidhje me gjendjen e saj shëndetësore ka folur sot nënkancelari, Olaf Scholz. Sipas Reuters, Scholz tha se Merkel ndodhet në gjendje të mirë dhe po punon që nga shtëpia e saj.
“Kancelarja është në gjendje të mirë shëndetësore në këtë moment. Ajo është thjesht në zyrën e saj në banesë, ashtu si shumë njerëz të tjerë që u është dashur të vendosen në vetëizolim në shtëpi. Ajo është aktive: ne patëm mbledhjen e kabinetit qeveritar këtë mëngjes. Jo me video, por sigurisht që të gjithë njohim zërat e njëri-tjetrit”, tha nënkancelari gjerman..
Olaf Scholz sqaroi se ai do të fliste në vendin e Merkel në dhomën e ulët të parlamentit të Bundestag të Mërkurën.
Situata nga koronavirusi në Gjermani duket se po përmirësohet, teksa flitet për një ulje të lehtë të rasteve të reja.
Drejtori i Institutit gjerman për Shëndetin Publik është shprehur se masat kufizuese në Gjermani po japin rezultat, pasi sipas tij përqindja e të infektuarve me koronavirus ka filluar të tregojë rënie.
“Kemi vërejtur se kemi rënie të personave të prekur me koronavirus. Por këtë trend mund ta konfirmoj përfundimisht në fund të kësaj jave”, ka shtuar ai.
