Më 29 shtator 2005, epidemiologu britanik dr. David Nabarro nga Organizata Botërore e Shëndetësisë, deklaroi në një konferencë për shtyp:
“Ne presim që pandemia tjetër e gripit të ndodhë në çdo kohë, duke nisur tani. Dhe ka të ngjarë që ajo të shkaktohet nga mutacioni i virusit, që po shkakton aktualisht gripin e shpendëve në Azi.
Epidemia e gripit të shpendëve duhet të kontrollohet tani, nëse duam që të parandalojmë një pandemi. Ekziston rreziku që numri i të vdekurve të jetë midis 5-150 milionë njerëz, që është një gamë që unë shpesh e përmend.
Unë besoj se puna që ne po bëjmë për parandalimin dhe gatishmërinë, do të bëjë diferencën. Pra nëse pandemia e rradhës, na çon drejt 150 milionë apo drejt 5 milionë viktimave. Ndaj efektiviteti ynë, do të matet direkt me jetët e shpëtuara dhe pasojat për botën”.
Deklaratat e dr. Nabarros tingëllojnë sot si një profeci. Sot në moshën 71-vjeçare, britaniku është këshilltar special i OBSH-së në luftën kundër koronavirusit. Pandemia sapo ka nisur, dhe është herët për të bërë bilance.
Por fakt është që pavarësisht frikës, punës përgatitore, shumica e botës u gjend sërish e papërgatitur për t’u përballur me pandeminë e koronavirusit.
TIRANA TODAY
