Mjekët stomatologë pritet të mbyllin klinikat deri në datën 3 prill. Mëngjesin e së enjtes, Urdhri i Stomatologëve Shqiptarë u ka bërë thirrje mjekëve stomatologë të ndalin punën dhe të mbyllin shërbimin dentare deri në datën 3 prill.
“Ju bëjmë thirrje të gjithë mjekëve stomatologë si dhe personelit të klinikave dentare, që të mbyllin shërbimin dentar deri më datën 3 prill 2020. Shërbimet e urgjencës dentare të kryhen vetëm konform Protokollit të O.B.SH.”, thuhet në njoftimin e Urdhrit të Stomatologëve.
Pak çaste më parë, kryeministri Edi Rama ka bërë publike të tjera masa në kuadër të parandalimit të përhapjes së Covid-19. Kreu i qeverisë bën me dije se kjo luftë nuk mund të fitohet ndryshe, prandaj, nga e premtja deri të dielën në mesnatë, do të ndalohet qarkullimi i automjeteve të transportit ndër-urban, nga Tirana, Durrësi dhe çdo zonë tjetër e vendit.
Bashkë me to, ndalohet edhe qarkullimi i automjeteve private në Tiranë, Durrës, Shkodër, Lezhë, Elbasan, Fier dhe Vlorë. Të vetmet mjete që do të lejohen të qarkullojnë janë vetëm automjetet shtetërore, autoambulancat dhe mjetet që transportojnë mallra.
