Pritja për të bërë testin, por edhe përballja me të panjohur ndaj koronavirusit, ka bërë që shumë njerëz të sillen në forma nga më brutalet. Një burrë i cili kishte simptomat e etheve në spital, kishte qëndruar në pritje për të bërë testin. Nga mbingarkesa e punës së mjekëve, ai kishte humbur durimin dhe kishte përshtyrë mbi një mjek dhe infermiere që po përpiqeshin ta qetësonin.
Ngjarja ka ndodhur në spitalin Cotugno në Napoli, ku ka reaguar edhe drejtori i përgjithshëm i spitalit, Maurizio Di Mauro. Ai ka thënë se pacienti në fjalë ka hequr maskën, dhe është kthyer kundër infermieres. Për këtë gjest, një mjek dhe një infermiere duhet të qëndrojnë të izoluar.
“Një gjest i tillë është si të të gjuash! Burri ka hequr maskën e tij dhe është kthyer kundër infermieres me atë gjest të neveritshëm. Unë kam humbur një mjek dhe infermiere shumë të mirë, të cilët tani duhet të qëndrojnë në izolim, dhe nuk mund të japin, siç kanë bërë deri më tani, kontributin e tyre të çmuar.
Jam zemëruar, ka djem dhe vajza që po japin shpirtin e tyre. Unë i kam parë vetë vajzat e reja të punësuara, 23-24 vjeç, të cilat mbase nuk e dinë se kë do takojnë dhe përsëri janë të gatshme të japin kontributin e tyre në këtë betejë kundër koronavirusit”, shprehet Maurizio Di Mauro.
