Kryeministri Edi Rama dha detaje për të prekurin me koronavirusi në Durrës, kur tha se është një grua e moshuar. Ai konfirmoi në mbledhjen e qeverisë se të gjitha rastet janë kontakte të importuara nga Italia.
Rama sqaroi ndër të tjera se skenarët që janë ndërtuar deri më tani janë sipas fazave, për t’iu përgjigjur dinamikës së shtrirjes së virusit. Si në çdo skenar, shtoi më tej ai, baza do të jetë e njëjtë.
“Numri i të prekurve është rritur dhe është shumë e rëndësishme të dëgjohet se 8 prej tyre janë vazhdë e dy kontakte, e një kontakti të vetëm dhe një të afërti, djali, babai dhe me radhë 6 të tjerë, që janë kontakte jo aq të afërta sa brenda mureve të shtëpisë.
Dhe dy raste të tjera, një e moshuar në Durrës, dhe një djalë në Tiranë. Të gjitha rastet janë kontakte të importuara nga Italia, duke pasur kaq shumë kontakte me Italinë, ishte e pashmangshme që ekspertët në bashkëpunim me OBSH të ndërtonin skenarët e një vendi fqinj me një zonë që sot është e tëra e kuqe.
Skenarët janë ndërtuar sipas fazave, për t’iu përgjigjur dinamikës së shtrirjes së virusit. Por baza mbetet e njëjta, si në skenarin e parë, të dytin, të tretin, si në fillim si në mes, si kur urojmë sa më shpejtë, forca e goditjes nga virusi do të shkojë në rënie”, tha Rama.
