Mediat italiane bëjnë me dije se dy prefektë të dy zonave të ndryshme janë prekur nga koronavirusi.
Bëhet fjalë për prefekten e Bergamos, Elisabetta Margiacchi dhe prefektin e Brescia Attilio Visconti.
Rezultati i testit për prefekten Elisabetta Margiacchi u bë publik ditën e djeshme, ndërsa mësohet se gjendja e saj nuk është shqetësuese. Ajo po koordinon urgjencën e krijuar nga koronavirusi në prefekturën e saj që nga zyra.
Ndërkohë, të gjithë bashkëpunëtorët e saj më të afërt janë izoluar në karantinë. Gjithashtu, në karantinë janë vendosur edhe ata që kanë ndjekur takime me të ditët e fundit.
Ndërsa prefekti i Brescia, Attilio Visconti nuk kishte marrë pjesë në takimet e ditëve të fundit sepse ai kishte përjetuar simptomat e para.
Ai nuk është në spital, por është në karantinë në banesën e Palazzo Broletto, selia e prefekturës Brescia. “Unë do të vazhdoj të punoj. Unë jam asimptomatik dhe kjo më lejon të vazhdoj për të luftuar përhapjen e virusit”, tha ai.
Kujtojmë se deri më tani në Itali janë shënuar 197 viktima dhe mbi 4 mijë të infektuar.
