Ish-kryetari i Aleancës Kuq e Zi, Kreshnik Spahiu, ka postuar shkrimin e gazetarit Alfred Peza, ku flet për lëvizjen që po përpiqet të bëjë presidenti Ilir Meta. Peza shkruan në komentin e tij se e gjitha çfarë pritet të ndodhë, është “grushti politik” që Ilir Meta synon ti japi Lulzim Bashës, në luftën e brendshme mes tyre për lidershipin e opozitës, pasi të shkarkohet si President i Republikës.
Po sipas Pezës, Ilir Meta e ka kuptuar se shkarkimi i tij si President, tashmë duket i pashmangshëm. Kjo pas tentativave për të bllokuar ringritjen e Gjykatës Kushtetuese. Kur e pa që mazhoranca e zhbllokoi situatën përmes procesit ligjvënës në Parlament në bashkërendim me SHBA e BE, Ilir Meta po mendon për tubimin në 2 mars. “Rruga që po ndjek, simbolet që po përdor, figurat që po promovon, spotet që po realizon dhe retorika që po konsumon në diskursin e publik, të rikujtojnë rrugëtimin e ndjekur pak vite më parë nga Kreshnik Spahiu”, shkruan ndër të tjera Alfred Peza.
