Mbrëmë Kuvendi miratoi paketën ligjore që ndryshon mënyrën sesi gjyqtarët betohen. Tashmë, gjyqtarët e Kushtetueses mund të mandatohen pa e pasur të detyrueshëm betimin para presidentit. Për mazhorancën ky është një mekanizëm zhbllokues, për presidentin Meta është “vjedhje” kompetencash.
Në lidhje me ndryshimet e bëra, presidenti Meta ka parashikuar një dalje publike sot, ku do të ketë bashkëbisedim me gazetarët.
Në një linjë me të, këshillitari i tij, Tedi Blushi është shprehur në facebook në një postim për atë që e quan ligji KRYEKÇK.
Ai ka shprehur habinë për miratimin e ligjit vetëm disa orë para takimit të parashikuar me komisionin e Venecias që sipas tij tregon një seriozitet të plotë.
Statusi i Plotë:
“Të nderuar kolegë gazetarë!
Kam marrë shumë pyetje nga ju, lidhur me ligjin që ka kaluar Kuvendi dje në mbrëmje vonë, nëse është apo jo në shkelje të Kushtetutës.
Së pari dua të shpreh çudinë e madhe që ky ligj miratohet në errësirë të plotë, vetëm pak orë para fillimit të takimeve të Komisionit të Venecias në Tiranë, të thirrur nga vetë Kuvendi, që tregon një mungesë serioziteti të plotë, panik për ngut dhe fakt të kryer.
Pra KAP ÇFARË TË KAPËSH.
Së dyti, për ne tashmë çudi përbën vetëm fakti kur ndonjëherë Kuvendi kalon ndonjë ligj që respekton Kushtetutën, pasi dhunimi sistematik i saj është kthyer në rregull.
Por sot paradite jemi të fokusuar te takimi me përfaqësuesit e Komisionit të Venecias.
Ndërsa pasdite ju premtoj se Presidenti do të kuvendojë me ju direkt nga Presidenca, dhe me të gjithë shqiptarët, për qëllimin e vërtetë të ligjit për KRYEKÇK-në”, shkruan Blushi.
