Rritet numri i viktimave të shkaktuara nga një ortek bore, i cili ra në një autostradë malore në provincën Van, të Turqisë.
Sipas CNN, deri më tani raportohet për 28 viktima, ndërsa ende nuk ka informacione të sakta se sa persona kanë mbetur të bllokuar nën borë.
Në autostradë ndodheshin rreth 300 pjesëtarë të ekipeve të shpëtimit, që po merreshin me pasojat e një orteku tjetër që ra mbrëmjen e së martës dhe la 5 njerëz të vdekur.
Guvernatori i provincës Van, Mehmet Emin Bilmez, u shpreh se në mesin e viktimave ndodhen policë, roje të sigurisë, zjarrfikës dhe civilë.
Ndërkohë mediat turke raportojnë se operacionet e kërkim-shpëtimit po vijojnë, por mjegulla, bora dhe era e fortë po e vështirësojnë më shumë punën.
