Tregtarët kinezë pranë Medresesë në Tiranë shprehen të shqetësuar në lidhje me mbërritjen në Tiranë të një bashkëkombësi të tyre.
Sipas tyre, ardhja e tij në datën 1 shkurt në Rinas rrezikon sjelljen e koronavirusit në Shqipëri. Ata thonë se personi në fjalë punon si kuzhinier në një restorant kinez në kryeqytet.
Ata kanë denoncuar rastin për Abc News, teksa shprehen se ai nuk është kontrolluar imtësisht dhe nuk është vendosur në karantinë.
“Minoriteti kinez që jeton në Tiranë ka shqetësimin e vet sepse ky person që ka ardhur një ditë më parë është edhe kuzhinier, punon në restorant, ndaj rreziku është më i madh. Sipas njoftimit të ambasadës, personat që vijnë nga Kina duhet të qendrojnë 14 ditë në karantinë”, shprehet Shuo Chen.
Abc News kontaktoi restorantin kinez ku punon kushinieri L.F. Në një bisedë telefonike ata thanë se punonjësi i tyre është i kontrolluar dhe i sigurt.
