Ligji i lirëve fetare i miratuar nga Mali i Zi një javë më herët ka ndezur debat dhe ka krijuar tension ndërmjet serbëve dhe malazezëve. Serbët e shohin ligjin si “grabitje” të trashëgimisë së tyre fetare.
Nga ana tjetër, presidenti Aleksandar Vuçiç ndihet i shqetësuar për Kosovën. Ai i trembet idesë se një ligj i tillë mund të miratohet dhe nga ligjvënësit në Kosovë.
“E shoh këtë përmes përgatitjeve, përmes librave të tyre shkollorë. Fushata po zhvillohet me vite. Flitet për trashëgiminë e Kosovës, e cila duhet të jetë ndryshe nga ajo serbe”, tha Vuçiç për gazetarët në Beograd.
Për ligjin fetar në Mal të Zi ka reaguar dhe Kisha Ortodokse Serbe, e cila e ka cilësuar si:përpjekje për të kapur pronën e Kishës në Mal të Zi.
Sipas Kishës Ortodokse Serbe, formulimi në ligj: “të gjitha objektet fetare, që kanë qenë pronë e shtetit të Malit të Zi para humbjes së pavarësisë më 1918 e që më vonë nuk kanë kaluar në pronësi të ndonjë bashkësie fetare në mënyrë legale, do të njihen si pronë e shtetit dhe do të regjistrohen si thesar kulturor”.
