Arilena Ara triumfoi me këngën ‘Shaj’ në edicionin e 58 të “Festivalit të këngës”. Këtë çmim ia dorëzoi këngëtarja Jonida Maliqi, si fituese e festivalit një vit më parë.
Pas festivalit, fansat e Elvana Gjatës iu kthyen kundër Arilenës, organizatorëve të festivalit, madje dhe Jonida Maliqit. E ftuar në emisionin ‘Rreze Dielli’, Jonida ka treguar se fansat e Elvanës kanë reaguar keq pse ajo i dedikoi një urim në Instastory Arilenës. Ajo zbuloi se disa fansa, aspak të edukuar, kanë reaguar mjaft keq pse postoi këngën e Arilenës.
“Më janë kthyer edhe mua kundër. Në fakt unë jam artiste. Nuk isha pjesë e jurisë, si artiste rrallë herë bëj qoka, por kur kam preferencat e mia e them.
Nëse një performancë më emocionon, patjetër që dua ta ndaj me publikun. Për faktin që Arilena është një vajzë 21 vjeçare, këndon shumë mirë live, me një këngë të mrekullueshme, postova një story me këngën e saj dhe citova fjalët: ‘Nuk ka mundësi kaq e re, me kaq shumë talent’.
Jam e lumtur që ia dhashë asaj çmimin, me Elvanën kam një raport më miqësor. Pas festivalit ashtu sikurse fola për Arilenën, fola dhe për të. Fansat adoleshentë, aspak të edukuar, me një zhargon rruge më hidhen pse postova këngën e Arilenës. Edhe sikur të kishte fituar Elvana, fansat me profil fake duan të bëjnë analistin”, u shpreh Jonida.
