Analisti Fatos Lubonja nuk e sheh me optimizëm vitin 2020 në sferën politike.
I ftuar në “Real Story”, Lubonja u shpreh se Shqipëria mund të ketë më shumë stabilitet në aspektin politik, por rrezikojmë edhe që situata të degjenerohet.
Sipas tij, futja e opozitës në sistem mund të vendosë balanca në politikë, gjë që mund të sjellë edhe trajtimin e një sërë problemesh me të cilat vijon të përballet vendi.
“Ne përgjithësisht na dominon një lloj pesimizmi. Pyetja që ngre unë është; a mendojnë kështu ata që kemi në pushtet, kështu si ne? Apo ne analistët që flasim për këto shqetësime ata na shohin si “qen që lehim”. Nëse kemi një qeverisje që nuk mendon kështu, atëherë është problem e ardhmja e vitit që vjen. A kemi ne shpresë se dhe brenda kësaj partie të ketë lëvizje, jam më shumë pesimist se sa optimist.
Ky Prokurori i Përgjithshëm, që është i pavarur, a kemi ndonjë shpresë nga ky? Ai ka prova konkrete! Kjo prapë të çon te pesimizmi. Futja e opozitës në lojë mund të balancojë gjëra dhe disa probleme mund të trajtohen. Por nuk duhet të harrojmë se kemi një opozitë, që dhe kulturalisht dhe nga mundësia se si është imponuar dialogu politik, mund të na çojë në një konflikt ose në eliminim të opozitës. Situata e 2020 mund të na çojë në kontroll të mëtejshëm të pushtetit nga Edi Rama dhe me stabilitet, por mund të na çojë në një degjenerim. Nuk jam shumë optimist”, deklaroi Lubonja.
