Kryeministri Edi Rama zhvilloi ditën e sotme disa takime me banorët e fshatit Rrubjekë të Shijakut, për të parë më nga afër gjendjen e tyre pas tërmetit që goditi vendin më 26 nëntor.
“Kemi parë tmerr, duke dalë këmbadoras, tjegullat në kaptinë, jemi trishtuar. Punët e Zotit, por shyqyr që dolëm shpejt” tha një e moshuar. Ndërsa kreu i qeverisë iu përgjigj: “Punët e Zotit nuk i dimë nuk na jep informacion”.
Po ashtu, gjatë bisedave më banorët që u janë dëmtuar shtëpitë, Rama kërkoi që ndërtesat e reja që do të ndërtohen të bashkohen në një parcelë, në mënyrë që të mos jenë të shpërndarë. Mirëpo një banor u shpreh se: “Nuk janë të gjithë një llafi”.
“Ndoshta tërmeti ua ka luajtur ndonjë vidë këtu (në kokë) që ta kthejë në drejtim tamam. Këtu nuk është më për ty e për mua se ne jemi pleq. Këtu është për kalamajtë që ta bëjmë më mirë, për këta”, shtoi Rama.
