Kryeministri Edi Rama ka inspektuar së bashku me Komisionerin e BE-së për Menaxhimin e Krizave, Janez Lenarčič shkollën 9-vjeçare “Neim Babameto” në Durrës, pas dëmtimeve që ka pësuar nga tërmeti i 26 nëntorit.
Në një moment, një çift bashkëshortësh i kërkuan kreut të qeverisë që të shkonte të inspektonte banesën e tyre. Sipas tyre, objekti shfaq rrezik edhe për ndërtesat që ndodhen pranë saj.
Lidhur me këtë rast, Rama iu tha që të presin radhën, pasi ekspertët do të shkonin në banesën e tyre për ta verifikuar.
Ndërkohë, ata takuan edhe dy ekspertë italianë, të cilët sqaruan se kostoja e rikonstruksionit të dëmeve të kësaj shkolle shkonin më shumë se sa një godinë e re. Për këtë arsye, zgjidhja më e mirë do të ishte rindërtimi nga e para e kësaj godine. Teksa i falenderoi për kontributin e tyre, kryeministri i ka cilësuar italianët si shqiptarë: “Unë e them gjithmonë që italianët janë shqiptarë të veshur me Versace”.
Biseda me banoren:
Qytetarja: Kemi shkuar në bashki dhe kemi kërkuar që të na shohin shtëpinë pasi u rrezikohet shtëpia.
Rama: Ju rrini rehat…Do vinë t’ua shohin shtëpinë.
Qytetarja: S’mund të presim se u rrezikohet banesa dhe të tjerëve. Kemi punuar 25 vite për atë shtëpi. Eja shiheni vetë.
Rama: S’jam ekspert. Po ta kisha unë fajin e zgjidhnim kollaj. Iksha unë dhe mbaronte puna. Sa fëmijë keni?
Qytetarja: 2 fëmijë
Rama: I keni bërë njëherësh??
Qytetarja: Jo një nga një
Rama: Atëherë prisni! Ku jeni fjet mbrëmë?
Qytetarja: Tek kunati
