Kryeministri Edi Rama i është përgjigjur kryeopozitarit Lulzim Basha në lidhje me 3 propozimet e tij për përballimin e situatës pas tërmetit.
Një nga pikat e propozuara nga Basha ishte anulimi i disa tenderëve me qëllim kalimin e këtyre fondeve për të ndihmuar familjet e goditura. Kreu i qeverisë theksoi se rindërtimi i banesave do të vijojë pa cenuar buxhetin e shtetit, duke deklaruar se asnjë tender nuk do të anulohet.
Ai i konsideroi tenderët për ‘check-up’ dhe Rrugën e Arbrit si “palcën e shtyllës kurrizore” të vendit, teksa thekson se ato nuk do të preken.
“Ne do ta bëjmë rindërtimin, por do vazhdojmë të bëjmë dhe punët e tjera. Rindërtimi është pjesë e kësaj, nuk do të cenojmë buxhetin. Nuk do të prekim ‘palcën e shtyllës kurrizore’ të të gjithë skeletit të buxhetit. Siç mund të na jetë sugjeruar si zgjidhje magjike. Ne do të realizojmë një fond, një kapacitet investues më të madh sesa ai i planifikuar nga ata që na thonë; merrni këtu, merrni aty dhe bëni këtë. S’do të prekim asnjë nga programet e shërbimeve, nuk mund të funksionojë kjo histori që t’ja marrim disave dhe t’ja japim disa të tjerëve. S’mund t’i themi njerëzve që; ju s’do të bëni kontroll mjekësore bazë falas se ne kemi rindërtim. Apo dhe atyre të sëmurëve me hemodializë. S’mund t’i themi nenave që shkojnë të lindin në materniteti, që; merrni gërshërë me vete se ne s’kemi pajisje. Nuk do ta ndalojmë rrugën për Rrugën e Arbrit se kemi rindërtim”, tha ai.
Kujtojmë se pika 3 e planit të opozitës janë:
- Anulim i 150 milionë dollarëve, të parashikuar në buxhet për koncesionet e 10 oligarkëve.
- Inceneratorët, projektet rrugore me çmim të trefishuar apo koncesionet korruptive në shëndetësi,
- kalimin e këtyre fondeve për të ndihmuar familjet e goditura..
