Kreu i PD-së, Lulzim Basha ka zhvilluar ditën e sotme një takim me banorët e prekur nga tërmeti në Borizanë, pak kilometra larg Thumanës.
Përmes një postimi në Facebook, Basha u shpreh se në këtë zonë nuk ka shkuar asnjë inxhinier apo ekspert për të vlerësuar situatën. Sipas tij, banorët e asaj zone që janë prekur nga tërmeti kanë fjetur prej 1 jave nën streha plastmasi.
Ai falenderon kontribuuesit dhe donatorët, të cilët sipas tij janë të vetmit që kanë shpërndarë ndihma në këtë zonë.
Postimi i plotë:
Ata që kanë mbetur jashtë vëmendjes janë shumë. Në Borizanë pak kilometra larg Thumanës banorët që u janë dëmtuar shtëpitë kanë fjetur prej 1 jave nën streha plastmasi. Familjet e dëmtuara presin vlerësimin e banesave nga ekspertë dhe inxhinierë por deri më sot askush nuk ka ardhur. Më thanë se po detyrohen të marrin borxhe sepse shteti nuk po kujtohet t’u vijë në ndihmë dhe nuk kanë ku të shkojnë. Falenderoj kontribuuesit dhe donatorët që janë të vetmit që kanë shpërndarë ndihma në këtë zonë, dhe bëj thirrje për shtimin me urgjencë të grupeve të vlerësimit në terren me qëllim përmbylljen sa më parë të vlerësimit profesional të gjendjes së banesave. Koha nuk pret!.
