Drejtuesi i ekipit të Mbrojtjes Civile në Bashkimin Evropian, Peter Glerum deklaroi se ekipet ndërkombëtare me ekspertë do të vijojnë të qëndrojnë në Shqipëri, deri në përfundimin e konstatimit dhe vlerësimit të dëmeve që ka shkaktuar tërmeti.
Gjatë një konference për mediat, Glerum nënvizoi se ekspertët ndërkombëtarë kanë ardhur që të martën dhe nuk do të largohen.
“Ne do jemi këtu deri në vlerësimin e plotë të dëmeve dhe deri në momentin kur ndihma ndërkombëtare të shkojë në destinacion dhe do sigurohemi se çdo njeri që është në nevojë do ta marrë atë. Për momentin kemi krijuar një bashkëpunim të shkëlqyer me qeverinë shqiptare”, tha Glerum.
Ndër të tjera, ai shtoi se po bëhet një strukturim i mirë për koordinimin e të gjithë aktiviteteve, me synim rimëkëmbjen e kësaj situate.
“Ishte një situatë kaotike në fillim, por tani një strukturë e themeluar mirë, me ministrin Çuçi, për të koordinuar të gjithë aktivitetet dhe ne e mbështesim atë. E mbështesim në vlerësimin e dëmeve, pra ne vlerësojmë të gjithë ndërtesat për sigurinë për të siguruar të gjithë shqiptarët të dinë nëse mund të kthehen në shtëpitë e tyre ose nëse ato duhen riparuar apo shkatërruar plotësisht.
Dje patëm 38 inxhinierë në terren, sot do të kemi 50 dhe operacioni do të vazhdojë edhe ditët në vijim. Do të jetë një kombinim mes shqiptarëve dhe inxhinierëve ndërkombëtarë për të siguruar standardet ndërkombëtare. Ky proces po ecën mirë” deklaroi ai.
