Tërmeti prej 6.4 ballësh që tronditi vendin ka shkaktuar pasoja të mëdha në shumë vende. Shumë pallate në zonën e Durrësit, Krujës, Tiranës, Lezhës dhe Laçit janë dëmtuar apo shkatërruar plotësisht duke shkaktuar edhe viktima.
Mirëpo një rast i dhimbshëm vjen nga Laçi ku një çift i moshuar do të flenë në pallatin i cili është shpallur i pabanueshëm.
Ndue dhe Dave Ruçi janë dy të moshuar që jetojnë në pallatin 145 në zonën e Laçit. Bashkëshorti është i sëmurë me zemër dhe ka vështirësi në të ecur dhe nuk rrinë dot në çadër për shkak të komplikacioneve shëndetësore.
Ndërsa askush nuk u ka ofruar strehim në ndonjë banesë apo hotel jashtë Laçit.
“Nuk ke çfarë të thuash, është e zotit. Kemi pas frikë por nuk kemi çfarë të bëjmë nuk kemi ku të shkojmë”, u shpreh Ndue Ruçi, për Top Channel.
Ndërsa gruaja e tij thotë se: “Nuk kemi dalë fare jashtë pasi ai nuk mund të eci dhe unë rri me të”.
