Pas përplasjes me ndërkombëtarët, presidenti Ilir Meta, në një konferencë të jashtëzakonshme për mediat, tha se Kushtetuta mbetet vija e kuqe e pakalueshme.
Presidenti i Republikës, Ilir Meta, u shpreh se vija e kuqe është Kushtetuta, ndërsa solli në vëmendje 22 nëntorin që përmes referendumit popullor solli Kushtetutën e re. “Kushtetuta e 98-ës vendosi rotacionin normal politik. Kjo Kushtetutë gëzon nderimin e shqiptarëve, por u zhbë në errësirë të plotë nga marrëveshja politike e vitit 2008”, tha Meta.
“Ndryshimet që u bënë në 2016-ën, kanë nxjerrë në pah probleme akute që u paralajmëruan se do të ndodhnin. Kushtetuta u kthye në rregullore me data dhe afate që janë shkelur që të gjitha, që kanë shkaktuar një kaos ligjor, që po çon në paralizimin e sistemit të drejtësisë”, shtoi më tej Meta.
Deklarata e Kreut të Shtetit vjen pas ngërçit të krijuar gjatë javëve të fundit, për ngritjen e Gjykatës Kushtetuese.
