Ministrja e Arsimit, Besa Shahini ka denoncuar rastin e një libri që përdoret nga nxënësit e klasave të teta në vend, i cili ka një tjetër hartë që nuk e njeh Kosovën si shtet.
Përmes një postimi në Facebook, Shahini sqaron se ky është një gabim i paqëllimshëm dhe se libri në fjalë është ndaluar para se të dilte në treg.
Kujtojmë se pak ditë më parë kryeministri Rama publikoi një video, ku Kosova shfaqej si pjesë e Serbisë. Postimi u ndërrua pas 5 orësh por kreu i qeverisë nuk dha asnjë sqarim në lidhje me këtë ‘gafë’.
Postimi i plotë:
Më erdhi keq kur pashë të postuar në rrjete sociale një faqe të një libri me pasaktësi në hartën e rajonit të Ballkanit.
Kosova është Republikë dhe njihet si e tillë nga Shqipëria, Maqedonia e Veriut, Mali i Zi, 22 vende anëtare të BE-së, SHBA-të dhe shumë shtete të tjera aleate.
Por nga autori i librit, te artisti grafik, te redaktori i shtëpisë botuese e deri te komisioni që ka dhënë OK për botim, nuk kanë qenë në gjendje ta vërejnë mungesën e shtetit të Kosovës në të!
Ky është natyrisht një gabim i paqëllimshëm dhe s’është i vetmi, megjithëse janë bërë përmirësime kolosale në korrigjimin e teksteve shkollore.
Por pa diskutim që nuk do të duhej të ekzistonin pasaktësi të tilla në librat shkollorë! Lajmi i mirë është se kjo ka ndodhur ndërkohë që po zhvillohet procesi i kontrollit të librave shkollorë, pasi sivjet është mbyllur procesi i hartimit të librave të rinj. Pastaj do të vihet në lëvizje detyrimi për shtëpitë botuese që t’i adresojnë menjëherë me fletë plotësuese gabimet e konstatuara, ndërsa në vijim me redaktim të plotë.
