Kreu i Shtetit, Ilir Meta, ka shuar zërat në lidhje me vendimin e ndërmarrë ndaj ambasadorit të OSBE-së në Tiranë, Bernd Borchardt, duke nënvizuar se disa diplomatë janë bërë leckë për Ramën. I ftuar në “Open” në Top Channel, Meta tha se disa diplomatë e kanë tepruar me qëndrimet e tyre. Me theks të veçantë tek zgjedhjet, presidenti Meta u shpreh se nuk është në të drejtën e një ambasadori, që të verë në dyshim dekretin e tij. Teksa ka shënjestruar Ramën, ai tha se kryeministri i përdor ambasadorët, për të kapur të gjitha institucionet.
“Nuk është në të drejtën e një ambasadori, të vërë në dyshim dekretin e Presidentit për zgjedhjet. Ka qenë shumë i lartë edhe raporti i OSBE/ODIHR, që dekreti i Presidentit mund të shqyrtohet vetëm nga Gjykata Kushtetuese.
Pa dyshim ndaj personit, jo ndaj OSBE. Qëndrimet e tij janë krejt të ndryshme nga raporti i OSBE/ODIHR, që as nuk u publikua këtu nga zyra e OSBE-së derisa e përmendi kryetari i opozitës.
Mendoj se ka disa diplomatë, që e kanë tepruar si shumë. Janë bërë si lecka të Edi Ramës. Këta janë justifikim për çdo shkelje të Kushtetutës dhe ligjit. Ai nxjerr këta, dhe përdor këta për të kapur të gjitha institucionet, për të kapur sistemin e drejtësisë. Ne zbuluam kush është “Katica” jonë, dhe “Katica” jonë është Dvorani.
Ka patur një lobim të fortë, për t’i dhënë gjithë drejtësinë Edi Ramës. Pavarësisht se BE dhe SHBA kanë dhënë shumë para për çështje të tjera, por këta kanë bërë çdo gjë për t’ia dhënë Edi Ramës. Këta kanë lobuar që t’ia jepnin me Kushtetutë Edi Ramës”, tha më tej ai.
