Ish-ministri i Drejtësisë, Ylli Manjani, shkruan se skenarët e shkarkimit të presidentit Ilir Meta dhe shpërndarjes së Kuvendit, nuk mund të realizohen. Sipas Manjanit, në një përplasje të tillë, ku çdo mjet nuk përjashtohet, fiton më i forti, por humbet Shqipëria.
Në komentin e radhës në Facebook, ai nënvizon se procedura e shkarkimit të presidentit është jo Kushtetuese. Po kështu, Kushtetuta parasheh se shpërndarja e Parlamentit bëhet vetëm kur ky i fundit dështon të zgjedhë kryeministrin, ose kur nuk arrin të miratojë buxhetin. Për rrjedhojë, cilido nga palët që do të ndërmerrte një hap të tillë ekstrem, do sillte pasoja shumë të rënda për vendin.
Statusi
Si kërcënimi i Parlamentit (Edi Ramës) që do shkarkojë Presidentin, ashtu edhe kërcënimi i Presidentit (Ilir Metes) se do shpërndajë Parlamentin janë tërësisht jashtë hapësirës Kushtetuese të Republikës.
Siç e kemi stërshpjeguar, madje edhe të konfirmuar nga Komisioni i Venecias, procedura e shkarkimit të Presidentit është jo Kushtetuese.
Nga ana tjetër, Kushtetuta parasheh se shpërndarja e Parlamentit bëhet vetëm kur ky i fundit dështon të zgjedhë Kryeministrin ose kur nuk arrin të miratojë buxhetin.
Asnjëri nuk legjitimohet të bëjë atë që kërcënon se do ta bëjë!
Cilido që do të ndërmerrte një hap të tillë ekstrem, pra të përdorte autoritetin formal për të goditur tjetrin, do sillte pasoja shumë shumë të rënda për vendin.
Në një përplasje të tillë, ku çdo mjet nuk përjashtohet, fiton më i forti por humbet Shqipëria.
Ndaj nuk dua as ta mendoj këtë skenar. Nuk ja ka borxh ky vend askujt as një ’97 tjetër, por as një Enver Hoxhë të ri…
