Pas votimit për zgjedhjen e delegatëve të Kongresit të PS-së, kryebashkiaku i Tiranës Erion Veliaj nënvizoi se ky proces tregoi edhe njëherë se PS është një organizëm aktiv. Sipas tij, është gara e brendshme që e bën PS një forcë politike gjithmonë fituese.
Në një prononcim për mediat, Veliaj u shpreh se arsyeja pse PS fiton gjithmonë në këtë qytet, por edhe në të gjithë Shqipërinë, është se stërvitet dhe garon me veten.
“Ne nuk i bëjmë kurrë llogaritë mbi një kundërshtar të zvetënuar, por i bëjmë me çfarë ishte dita jonë më e mirë dhe sesi e nesërmja mund të jetë më e mirë se e djeshmja për PS”, tha Veliaj.
Ndër të tjera, kryebashkiaku iu bëri thirrje të gjithë qytetarëve të Tiranës që të bëhen nesër pjesë e aktiviteteve të ndryshme festive për 75-vjetorin e çlirimit.
Po ashtu, Veliaj u ndal edhe në inaugurimin e stadiumit të ri.
“Kur kujtoj sesa sherr, shamata, stërkëmbësha, teori konspiracioni dhe histeri pati stadiumi. Dhe kur shoh sesi shumë nga ata që e shanë, sot janë duke kërkuar bileta, që është normale për një ndeshje të parë inauguruese, nuk mund të shkojnë të 1 milion qytetarët e Tiranës, më bën të vë buzën në gaz dhe të kujtoj se gjithmonë duhet ta kemi fokusin tek shumica e heshtur e atyre njerëzve që votojnë, ndihmojnë demokracinë, jo tek një minorancë e zhurmshme që as nuk i ka votuar njeri, as nuk pranojnë të vijnë në ndonjë garë dhe vetëm duan të bllokojnë historitë e suksesit të këtij qyteti”, deklaroi Veliaj.
