Kryetarja e Forumit të Gruas në PPE, Doris Pack zhvilloi ditën e sotme një takim me gratë e FRPD-së.
Gjatë fjalës së saj, ajo shprehet e trishtuar për gjendjen e vështirë që po kalon Shqipëria. Ndërsa iu bën thirrje të rinjve që të mos largohen nga vendi, por të qëndrojnë. Pasi, sipas saj, demokracia është në rrezik dhe vendi ka nevojë për frymën dhe vizionin e të rinjve.
“Mund t’ju them se jam vërtetë e pikëlluar sepse kur kam ardhur këtu në vitet ’91, ’95, ’96, 2004 kam parë ndryshimet por tani ju them me trishtim se po shoh gjendjen më të keqe.
Është një situatë ku demokracia është në rrezik. Është një situatë që nuk besoja kurrë se do të ndodhte. Qëndroni në vendin tuaj, ka ende shpresë sepse vendi ka nevojë për ju”, tha Pack.
Ndër të tjera, ajo përçoi edhe një mesazh drejtuar klasës politike, që të punojnë në të mirë të vendit dhe të mos i shërbejnë parasë.
“Korrupsioni është në nivelin më të tmerrshëm. Kjo është diçka shumë e keqe. Politikanët duhet të bëjnë atë për të cilën janë votuar e jo t’i shërbejnë parasë për veten e tyre”, theksoi Pack.
Betimi i Arta Vorpsit te noteri/ Doris Pack: BE duhet të veprojë
Po ashtu, pjesë e bisedës ka qenë edhe ish-deputetja Albana Vokshi, e cila tha se vendi ndodhet në krizë totale.
