Ministrja e Shtetit për Marrëdhëniet me Parlamentin, Elisa Spiropali, ka komentuar vendimin e presidentit Meta për dekretimin e Marsida Xhaferllarit si gjyqtare të Gjykatës Kushtetuese.
Përmes një postimi në Facebook, Spiropali tha se me këtë veprim presidenti i është kundërvënë edhe njëherë Reformës në Drejtësi, SHBA-së dhe BE-së. Sipas saj, dekretimi i Xhaferllarit është kundër ligjit dhe kundër qëndrimit të tyre pasi është një gjykatëse mbrapa liste.
Postimi i plotë:
Edhe njëherë Ilir Meta iu kundërvu Reformës në Drejtësi dhe Shteteve të Bashkuara e Bashkimit Europian, duke dekretuar kundër ligjit dhe kundër qëndrimit të tyre, me zero legjitimitet kushtetues e ligjor, një gjykatëse mbrapa liste.
Edhe njëherë kundërvënia brutale e Ilir Metës ndaj prioritetit themelor të vendit, drejtësisë, na bën të ndjehemi keq për Presidentin e Republikës. Edhe njëherë, Ilir Meta dha një shembull spektakolar për ta kuptuar kush ende nuk e ka kuptuar, se Reforma në Drejtësi ndan thellë e qartë shumicën qeverisëse dhe parlamentin e vendit, nga fronti i atyre që me në krye Ilir Metën, i bashkon kundër nesh Frika nga Drejtesia.
