Pasi IKMT ka paralajmëruar se do të ndërhyjë për të shembur banesat, banorët e zonës së ‘Astirit’ kanë dhënë paralajmërimin e radhës. Ata janë mobilizuar me shkopinj në duar, për të mbrojtur banesat e tyre. Njëri nga banorët, në një intervistë për ‘Fax News’, u shpreh se do të rezistojnë deri në vdekje, për të mbrojtur pronat e tyre. Po kështu, një thirrje iu është drejtuar Policisë së Shtetit, që të mos afrohen tek banorët. Mjaft të revoltuar, ata bashkërisht kërkojnë dialog për problemin e tyre.
“Këto nuk duan zgjidhje. Këto duan përballje me qytetarët e pafajshëm. Kush ka gjë në dorë për të ndaluar këto kriminela, të reagojë. Këtu duan që ti hapin rrugë kullave, që do të shitet 5000 euro metri.
I bëj thirrje segmentit të Policisë së Shtetit, mos u afroni tek ne. Kemi 1 vit që jemi dhunuar, na kanë torturuar. Këta po vijnë tek ne, që do të na dhunojnë. Ne duam zgjidhje, duam dialog.
Nuk jemi kundër projekteve për zhvillim. Sot nuk pritet nga banorët e ‘Unazës së Re’ asgjë. Ne jemi në pronat tona. Nuk mundesh të shkelësh të drejtat e njeriut. Ne jemi krenar që qëndruam para këtyre banditëve.
Edi Rama, pushtetin e ka ndarë me kriminelët. Ne kërkojmë zgjidhje dhe dialog. Ne do rrezikojmë deri në frymën e fundit. Jemi të vendosur deri në vdekje”, u shpreh njëri nga banorët.
