Presidenti i Serbisë, Aleksandar Vucic deklaroi se do të kërkojë mbështetje për projektin “Mini-Shengen” nga ana e presidentit francez Emanuel Macron, në takimin që pritet të zhvillohet këtë të martë.
“Unë jam mirënjohës për amerikanët që mbështesin këtë projekt, shpresoj se do të marrim edhe mbështetjen e Macron, sepse pa këtë do të jetë e vështirë të marrësh mbështetjen e Evropës.
Ai ka energji të jashtëzakonshme dhe nëse një pjesë e asaj që ai po fliste mund të realizohej, unë mendoj se do të ishte një lajm i mirë për Serbinë”, tha Vuçiç ditën e sotme në “RTS”.
“Unë nuk do t’i nënvlerësoja idetë e tij dhe t’i zhvleftësoja ato, siç bëjnë të tjerët. Unë dua të flas edhe për këtë iniciativë. Do ta pyes dhe do të kërkoj mbështetje, sepse nëse e kemi, do të krijojmë kushte krejtësisht të reja dhe kjo do të ishte një nga burimet tona të rritjes së përshpejtuar vitet në vazhdim. Mund të mos kemi pasur kurrë biseda më të rëndësishme me Macron”, shtoi ai.
