Drejtori i Përgjithshëm i Kadastrës, Artan Lame, ka habitur me deklaratën e tij të bërë së fundmi. I ftuar në emisionin “Wake Up” në Top Channel, Lame tha se e kanë kërcënuar me jetë për çështje pronash.
“Kërcënime për punë emërimesh nuk kam marrë, për punë pronash po sepse ka një gjë nuk e bën dot pa specialistë. Duhet të jesh profesionist, ndërsa të jesh punonjës te Hipoteka duhet të jesh o jurist me bagazh, o topograf, prandaj kam bërë thirrje që më lini o të bëj këtë o të bëj atë”, deklaroi ai.
Lame nuk tregoi asnjë rast konkret, teksa shtoi se këto raste i ka denoncuar dhe ka marrë mbështetje nga qeveria.
“Nuk mund të them raste. Është normale ka pasur disa raste, që nga rastet serioze dhe unë i kam referuar, deri te rastet e njerëzve që të stërlodhin por kur ikin qetësohem. I mirëkuptoj në fakt se janë të dërmuar duke pritur me vite dhe kur i thua duhet të shkosh në gjykatë sikur i ke vrarë. Por sinqerisht më duhet të falënderoj qeverinë sepse më ka dhënë shumë mbështetje”, tha ai.
