Ambasadori i Francës në Serbi, Jean Louis Falconi, ka komentuar refuzimin e negociatave për Shqipërinë dhe Maqedoninë e Veriut, duke u shprehur se dy shteteve nuk u është thënë ‘JO’.
Në një intervistë për agjencinë “Fonet”, Falconi tha se atyre u është thënë “Po, por” dhe “Po, nëse”, çfarë lë të kuptohet se Franca është e hapur ndaj dy shteteve, nëse përmbushin kriteret e kërkuara.
“Maqedonisë së Veriut dhe Shqipërisë nuk i është thënë “jo” në Bruksel dhe nuk kanë marrë një përgjigje negative për fillimin e negociatave. Në Bruksel, Shkupit dhe Tiranës iu tha “po, por” dhe “po nëse””, ka deklaruar Falconi.
Më tej, ai shtoi se fillimi i negociatave do të pasojë menjëherë pasi dy vendet ballkanike të kenë përfunduar reformat e nevojshme. Sipas tij, procesi aktual i pranimit të ngadaltë duhet të bëhet “më i shpejtë, më përparimtar, por edhe i kthyeshëm”.
“Ideja është që, kur një vend të përfundojë me negociatat në një zonë të caktuar, do të jetë në gjendje të ulet në të njëjtën tryezë me vendet anëtare dhe të marrë pjesë në hartimin e politikave, por pa një të drejtë votimi”, tha ai.
