Që në nisje të seancës plenare, kryetarja e grupit demokrat në Kuvendin e Shqipërisë, Rudina Hajdari, lëshoi një deklaratë të fortë në foltoren e Kuvendit, se është kërcënuar në zyrë në Kryesinë e Kuvendit. Gjatë fjalës së saj, Rudina Hajdari nuk dha sqarime se kush e kishte kërcënuar, por vetëm iu drejtua Ruçit që të merreshin menjëherë masat.
Ajo iu drejtua Ruçit me kërkesën që të merren masat sa më shpejt, që deputetët të kontrollohen para se të futen në Kryesinë e Kuvendit, para se të ketë ndonjë viktimë. Ndërkohë që kryetari i Kuvendit, Ruçi, iu përgjigj duke thënë se shkresën ia ka dërguar Ministrit të Brendshëm, për të marrë masa për sigurinë e saj.
A ka lidhje kërcënimi për vajzën e Azem Hajdarit, me atë që po ndodh në grupin demokrat? Duket se konflikti brenda grupit parlamentar demokrat të kryesuar deri tani nga deputetja Rudina Hajdari, do të vijojë. Deputeti Korab Lita, i cili pretendon se është zgjedhur kryetar pas dorëheqjes së Hajdarit, tha në seancën e sotme se në mbledhjen e grupit më 24 tetor, është vendosur të mos pranohet kërkesa e pesë deputetëve të opozitës parlamentare që donin t’i bashkoheshin grupit demokrat.
“Grupi parlamentar më 24 tetor vendosi të mos pranojë kërkesën e deputetëve për anëtarësim. Grupi do vazhdojë të ketë 9 anëtarë. Me 5 vota pro dhe 3 kundër është vendosur që të mos pranohet asnjë anëtar i ri për momentin në grupin parlamentar demokrat”, deklaroi Lita.
Diskutimet në Kuvend
Korab Lita: Ju e shkelët rregulloren, pasi ju duhet të bënit vetëm lajmërimin dhe jo interpretimin. Grupi Demokrat ka marrë në konsideratë kërkesat për anëtarësime të reja në grupin parlamentar, dhe grupi i mbledhur në datë 24 tetor vendosi të mos pranojë kërkesën e deputetëve për anëtarësimin, do të vijojë të ketë nëntë anëtarë. Me 5 vota pro dhe 3 kundër, u vendos që të mos pranohet asnjë anëtar i ri në grupin Demokrat, do të vijojë të jetë me 9 anëtarë.
Rudina Hajdari: Para pak ditësh u dërgova një shkresë, për një kërkesë që të sigurojë ambientet e Kuvendit dhe të Kryesisë. Nuk mund të ndodhë sot që deputetët të kërcënohen. E papranueshme që një femër të kërcënohet. Kam pasur raste që në zyrën time më kanë ardhur dhe më kanë kërcënuar. Ka ikur ajo kohë. Ju lutem, merrni masat para se të kemi ndonjë viktimë. Masat të jenë në Kryesinë e Kuvendit, asnjë deputet nuk duhet të hyjë pa u kontrolluar, të marrë të tjerë dhe të shantazhojë. Ju lutem të merren masat.
