Prokurorja e Krimeve të Rënda, Sonila Muhametaj ka kaluar ditën e sotme procesin e vetting-ut. Konfirmimi në detyrë u vendos nga Komisioni i Pavarur i Kualifikimit.
Pak muaj më parë, Muhametaj u dërgua në hetim disiplinor nga kryeprokurorja Arta Marku, pasi refuzoi zgjedhjen me short të Prokurorit. Ky i fundit do merrte në dorë çështjen “Shullazi”.
Sonila Muhametaj u përball me barrën e provës për mungesë burimesh financiare për pagesën e disa kredive dhe detyrimeve në shumën totale prej 720 mijë lekësh.
Ajo është emëruar në vitin 2017 prokurore në Prokurorinë e Krujës. Në vitin 2014, ajo është transferuar në Prokurorinë e Tiranës. Ndërsa në vitin 2015, u dekretua nga Presidenti si prokurore e Prokurorisë së Krimeve të Rënda.
Në shtator 2018, Muhametaj ishte një ndër tre prokurorët e transferuar me urdhër të kryeprokurores Arta Marku, pas një konflikti në Prokurorinë e Krimeve të Rënda për dosjen “Shullazi”. Ajo ngriti padi kundër vendimit në Gjykatën Administrative dhe e fitoi çështjen, duke u rikthyer nga Prokuroria e Pukës në atë të Krimeve të Rënda.
